ЮРАК ЧИҚМАС ЎЗ ҚАЛЪАСИДАН

Юрак чиқмас ўз қалъасидан…
Корея кундалигидан
Корея, сен жуда гўзалсан,
Боғларинг ҳам мафтункор, сокин.
Шундай иссиқ бағрингда туриб,
Ўз юртимни соғиндим лекин.
 
Кўрдим баланд бу биноларинг
Тараққиёт чўққиси эрур.
Лекин одам ўз Ватанининг
Пойига тиз чўккиси келур.
 
Сен қанчалар мафтункор бўлма,
Юрдим кўзда кўз ёшим қалқиб.
Чунки кўзим ўнгида доим,
Тураверди меҳрибон халқим.
 
Корея, сен гўзалсан, лекин,
Юрак чиқмас ўз қалъасидан.
Ўзбекистон руҳимга сингган
Онажонимнинг алласидан.
 
Балки, сенинг боғларингга ҳам
Таъзим айлаб келади баҳор.
Аммо билсанг, Ўзбекистоннинг
Тонгларида илоҳий файз бор.
 
Лол қолдирди шолизорларинг,
Халқинг каби тоза, саришта.
Лекин билсанг Ўзбекистоннинг
Манглайидан ўпган фаришта.
 
Корея, сен қудратлисан, лек,
Қара менинг рангу рўйимга.
Айт, қудратли самолётларинг
Олиб бориб қўйсин уйимга.
 
Нафасларим бўғзимда қотган,
Жоним соғинч деган ўтдадир.
Мен англадим: бутун дунёда
Худо битта, Ватан биттадир!!!
 
 
***
Кетишимга озгина қолди,
Ўз юртимнинг дийдорин кўргум.
Кўз ёшларим арийди энди,
Чин кулгуга айланар кулгум.
 
Ўз тилимда сўзлайман энди,
Завқу шавқлар, баҳралар билан.
Бугун қутлуғ учрашувим бор,
Файзли, очиқ чеҳралар билан.
 
Соддагинам, мунисим халқим,
Томчи-томчи сингдинг қонимга.
Қандоқ қилиб ўрнашиб олдинг,
Бор борлиғим, жон-жаҳонимга.
 
Ўзбекистон деган исмни,
Манглайдан юракка кўчирдим.
Дийдоринг кўрмаган кунларни,
Умр дафтаримдан ўчирдим.
 
Фидоликда топай ўзимни,
Қолайин Ватаннинг ёдида.
Чунки фақат тиз чўкиш мумкин,
Худо ва Ватаннинг олдида.
 
Онасин соғинганлар
Соғиндим, онамни мустаргинамни,
Мунисим, мушфиқим, рангпаргинамни,
Сўлимим, чиройлим, дилбаргинамни,
Йўл беринг, онасин соғинганларга.
 
Сочига оқ гуллар экибди ҳаёт,
Юзига имзолар чекибди ҳаёт,
Онам хўп чўкибди… тўкибди ҳаёт,
Қўл беринг, онасин соғинганларга.
 
Кўп меҳр бермадим, хизмат қилмадим,
Қачон хизмат қилсам миннат қилмадим?
Балки пушаймоним шундан, билмадим.
Дил беринг, онасин соғинганларга.
 
Жуда кўп юрдим мен ўзимни севиб,
Энди кўз ёшларда қолайин ивиб,
Юрак зангларини олсинлар ювиб,
Кул беринг, онасин соғинганларга!
 
Ҳар тирик жон бориб онасин кўрсин,
Кечикиб қолмасин, илдамроқ юрсин,
Қабригамас, бориб қўлига берсин,
Гул беринг онасин соғинганларга.
 
Йўл беринг онасин соғинганларга,
Соғиндим, онамни…
 
Шаън давралар
Бир жойда депсиниб турганим етар,
Мен шаън давраларга кетмоғим керак.
Кенгликлар бағрига бағрини босиб,
Олис манзилларни соғинди юрак.
 
Хандон кулгуларим, ўзимга келинг,
Яшамоқ завқига тўлди борлиғим.
Нақадар шарафли, қанчалар яхши,
Бу ёруғ дунёда менинг борлигим.
 
Шукр оғриқлиман ишқ дарди бирлан,
Руҳимнинг осмондан ҳомиласи бор.
Неучун чарақлаб ёнмасин кўзим,
Юзимдан бўсалар олганда баҳор.
 
Йўлимни тўсмангиз қочинг, буҳтонлар,
Мен битим тузганман қайғулар билан
Ва бутун умримни яшаб ўтарман,
Энг ёруғ, энг гўзал туйғулар билан.
 
Эй кир қўлларингни торт мендан, фосиқ,
Қоч чўчитма нурни, тўсма зиёни.
Мен ахир ГУЛларнинг ЖАМОЛидирман,
Гулларга тўлдириб кетай дунёни!
 
Келдим
Келдим, чиқиб кутиб ол мени,
Камалакман, тутиб ол мени,
Айрилиқдан сотиб ол мени,
Сени жуда соғиниб келдим.
 
Хижронингда қонлар ютдим мен,
Денгизлардан сакраб ўтдим мен,
Бахтдан кўпроқ сени кутдим мен,
Дийдорингга сиғиниб келдим.
 
Дардимни ол, толиқтирди ғам,
Шам мисоли ёниқ турди ғам,
Менга бунча содиқ турди ғам,
Бир ўзингга юкиниб келдим.
 
Бахт топмадим сендан йироқда,
Жону кўнглим ёнди фироқда,
Эй қудратлим, қутқар қийноқдан,
Ёш боладек ўкиниб келдим.
 
Жим турмагил азобинг чексам,
Жим туриб ҳам кўз ёшлар тўксам,
Ҳайрон бўлма пойингга чўксам,
Эски уйдай тўкилиб келдим.
 
Ишқ руҳимни бемакон қилди,
Битта эдим, бир жаҳон қилди,
Ҳижрон мени имтиҳон қилди,
…Бу синовдан йиқилиб келдим.
 
Сени жуда соғиниб келдим.
 
Эсладим
Кўзларингга термулиб,
Кўзларимни эсладим.
Ишқингда сармаст юрган –
Кезларимни эсладим.
 
Адашсанг гар адашган,
Чўққиларни талашган,
Изларингга эргашган –
Изларимни эсладим.
 
Ким маржон тизиб кетган,
Ким уни узиб кетган,
Оловдек қизиб кетган –
Юзларимни эсладим.
 
Севги олов, севги ўқ,
Вужудга текканда чўғ,
Боши йўқ, охири йўқ –
Сўзларимни эсладим.
 
Ким у кўнглимда юрган,
Руҳимда лола терган,
Ишқинг азоби берган –
Бўзларимни эсладим.
 
Бермам оҳорларимни,
Осмондек орларимни,
Ўтган баҳорларимни –
Кузларимни эсладим.
 
Кўзларингга термулиб,
Кўзларимни эсладим.
 
 
Ишқ ўти
Тангрим, оч руҳимнинг булоқларини,
Ишқ ювсин кўнглимнинг қирғоқларини,
Ҳис этай тафаккур тўлғоқларини,
Уйғонай!
 
Завқ олай муҳаббат қаҳридан,
Бол топай илонлар заҳридан,
Энг тоза туйғулар бағрида –
Тўлғонай!
 
Қўл бериб малаклар, ҳурларга,
Дунёлар очмаган сирларга,
Ҳеч завол билмаган нурларга –
Чўлғонай!
 
Қутқудан қонимни қутқарма,
Кўнглимни-хонимни қутқарма,
Бу ўтдан жонимни қутқарма,
Бир ёнай!